აერობიკა

აერობიკის ვარჯიშების დროს სისხლძარღვთა სისტემის მეშვეობით ორგანიზმი დიდი ოდენობით ჟანგბადს იღებს, რაც საჭიროა კუნთების მუშაობისთვის. რიტმული ვარჯიშები გამიზნულია კუნთოვანი მასის დასატვირთან, რაც სხეულში ჟანგბადის მოთხოვნის გაზრდას იწვევს.

ორგანიზმზე მოქმედება

აერობიკა დადებითად მოქმედებს ჩვენს სხეულზე: ცხიმის ფენა თხელდება და გვიბრუნდება ჩვენი სასურველი წონა, სტაბილიზდება სისხლის მიმოქცევა და მასში ქოლესტერინის დონე. ჩვენ გამოვიყურებით უფრო ახალგაზრდულად და თავსაც უკეთ ვგრძნობთ!

ვარჯიშის სახეები

ჯგუფთან ერთად აერობიკის ვარჯიშებში შეგვიძლია ჩავრთოთ სირბილი, ცეკვა, ცურვა, ველოსიპედით სიარული და ა.შ. ასეთი ტიპის ფიზიკური აქტივობა სასარგებლოა როგორც ქალებისთვის, ასევე მამაკაცებისთვის.

რეგულარული ვარჯიშის დადებითი მხარეები

რეგულარული ვარჯიშით (მაგ.: 30 წუთი დღეში) ვარჯიშის ყველა სარგებელს ვიღებთ:

• ძლიერდება იმუნიტეტი
• უმჯობესდება გუნება-განწყობა, მცირდება დეპრესიის განვითარების რისკი
• უმჯობესდება ძილი
• იწვება კალორიები

ვარჯიშები

დასაწყისისთვის მისაღებია კვირაში 3-ჯერ ვარჯიში, ხოლო შემდგომ შეიძლება დროისა და ინტენსივობის თანდათანობით ზრდა.

აერობიკის ვარჯიშები, როგორც წესი, 3 ნაწილისგან შედგება:

• გახურება-გამოცოცხლება. სხეული მზად უნდა იყოს ფიზიკური დატვირთვისათვის; ამიტომ სასურველია, არ გამოგვრჩეს ეს ეტაპი, რომლის დროსაც გულისცემა და კუნთების ტემპერატურა იზრდება. ასეთ შემთხვევაში დაზიანების მიღების რისკი ნაკლებია. დრო: 5-10 წუთი.
• აერობიკის ვარჯიშები (კარდიო). იგი მიმართულია სისხლის მიმოქცევისა და სუნთქვის პროცესის გაუმჯობესებისკენ, წვავს სხეულის ცხიმოვან ფენას. ამ შემთხვევაში ყველაზე ეფექტურია ნელი მაგრამ ინტენსიური ვარჯიში რაც თანდათანობით გაახანგრძლივებს სხეულის ამტანობის დროს და იწვევს ჟანგბადის ცვლას ორგანიზმში. დრო: 25-45 წუთი.
• ცალკეული კუნთების გამაძლიერებელი ვარჯიშები. ასეთი ტიპის ვარჯიშები მიმართულია კუნთების ცალკეული ჯგუფებისაკენ ან სრულდება სიმძიმეების მეშვეობით. დრო: 5-10 წუთი.

მოდუნება ძალიან მნიშვნელოვანია. ეს ერთგვარი ვარჯიშებია, რომლებიც ბოლოს უნდა შეასრულოთ. მისი მიზანია უმტკივნეულოდ დაუბრონოს ორგანიზმს გულისცემისა და სუნთქვის ნორმალური სიხშირე, რაც, როგორც წესი, იმატებს ვარჯშის დროს. ეს ვარჯიშები თავიდან აგაცილებთ თანმდევ სისუსტესა და თავბრუსხვევას. სცადეთ ეს ვარჯიშები მოდუნებისათვის:

• გულისცემის შენელება - მსუბუქი ჯოგინგი, სიარული, რელაქსაციური ცურვა
• მსუბუქი გაწელვა
• ღრმა სუნთქვა